10.19.2008

من نبض قلب الخوف

فوق الجبين مكتوب قدر
محفور علي جبينك قمر
يا صبيه يا زينة البنات
ياللي النجوم بتخاف من النجمه اللي شارقه
بين رموشك والكفوف
شايله ما بينها الف دقه للدفوف
بتزف قلبك ويا صمتك والحروف
لو يوم تقولي كلمتك
لو يوم تعدي بخطوتك
معني الألم راح ينهزم
والفجر حيشقشق علي جبينك
علي ضيك...علي قلبك
وحتعرفي
خوفك ده قوه
مش خنوع
والإعتراف بالضعف مش صفة الجبان
جايز ما بنحسش خطر
لكن قالوها زمان كتير
من نبض قلب الخوف
بيتولد الشجاع
انسان ما يعرف اي معني للضياع
لكنه بتهزه الدموع...وقت الوداع
زيك تمام
القلب ابيض...والدموع دايما قريبه
بتروي اوراق الشجر
وبإسمك انتي...فوق جبينك
مره تانيه
بيتمضي اسم القدر

2 التعليقات:

Ahmed Othman يقول...

هنا فلسفة خاصة جدا
***
الإعتراف بالضعف مش صفة الجبان
***
من نبض قلب الخوف
بيتولد الشجاع
***

هنا الحكمة و الحرف الراقي
تحية للحرفة و و الفكر

ريهام زينهم يقول...

إن الحكمة ورقي الحرف سيدي...هي اشياء نتعلمها من كلماتك....

شكرا لمرورك صديقي العزيز...