صوت الهسهسه..!!..

إزاي اكون

عصفور عيونه بتبتسم

فارد جناحه ف السما

وف قلبه فرحه بتترسم؟؟

وإزاي اكون..؟

وانا كل عمري بأعيش واشوف

ناس عايشه مرصوصه فـ صفوف

كل الوشوش متلونه

بين كدب متلون امانه

وبين امان مخلوط بخوف

وإزاي اكون..؟

فنان بيرسم الف لوحه مغشوشين

فوق الشفايف بسمه حلوه

والعيون مترغرغين

وقلوب بترقص م الألم

والنزف مكتوم والأنين

لون السما اسود مغطيها السحاب

والبحر مَنفِي وسط اسوار الضباب

ونسيت الوّن فجر بكره

وشمس زهزهها الدهب

ونسيت في وسط الزحمه قلبي

بتقتله موجة غضب

ولمين اكون..؟؟

وإن بعت قلمي وصحبتي

ورجعت ادور ع اللي راح

بألقي الجراح بتهدني

وترُدني

وافتح في كراس اللي فات

القي الألم بيودني

يرمي السلام والوشوشه

وارجع لعقلي

القي صوت الهسهسه

بيشدني

ويمد لي كومة ورق

حبر وقلم

الوان وفرشه ومسطره

واكتب انا

وارسم انا

لوحة عذاب متسطره