تيته حبيبتي
بأكتبلك بدموعي جوابب
أمسك قلمي بإيد مهزوزه
والرعشه بتظهر ف حروفي
ودموعي علي ورقي بتنزل
تمحي الحبر..قوام يتخلبط
وتنادي قلبك و بحرقه
قلبي خلاص مش حمل غياب
تيته يا غاليه
إشتقنالك
فين أيامك؟؟
كانت ماما بتزعلنا
وبنبكي بس ف احضانك
فاكره يا تيته؟؟
فاكره غزال؟؟
قلتي غزال راح بكره تهندس
وكتبت أنا علي جذع التوته
بكره راح أكبر وأبقي مهندس
حلمي يا تيته خلاص اتحقق
ياللي رسمتي ليا طريقي
بابا حاورني و قاللي طبيبه
قلتله تيته قالتلي أهندس
شفتي يا تيته
صح أنا فاكره
طالعه لتيته..نبيهه و شاطره
تيته حبيبتي...إشتقنالك
ياللي ف حضنك نمنا ليالي
إشتقنالك و الله يا غاليه
ليكي و لأيامنا الغايبه
فاكره يا تيته..فاكره التوته؟؟
جفت والله فروعها العاليه
ورجعنالها بعد غياب
مالقينا غير أرض وبايره
جذع التوته لسه بحاله
لسه كلامنا عليه محفور
لسه قلوبنا ساكنه ف جوفه
لسه اللحن عليه مسطور
فاكره يا تيته..فاكره اللحن؟؟
كنا زمان بندندن بيه
مهما هنبعد برضه هنرجع
للي نقشنا ضميرنا عليه
للي الحب ف قلبه ماليه
جذع التوته كمان مشتاقلك
وبيسأل عنك لياليه
لما يا غاليه ناويه تغيبي!!
بتخلينا نحبك ليه؟؟؟؟؟
علشان يبقي ألمنا زياده
حتي الجذع صعبنا عليه
فاكره يا تيته..فاكره الغنوه؟؟
وما تبكيش
مهما تكون الغربه بعيده
برضه راجع ما تبكيش
بكره يا قلبي راح نتقابل
في الحضن إللي هجرنا زمان
بكره هنرجع نلقي التوته
طارحه فروعها بشوق و حنان.
6 التعليقات:
اللة اللة
اية الكلام الحلو دا ياريم دا انا حسدتها
بوست هايل بل رائع كلماتة صادرة من القلب فية الذكرة الحلوة وحنين الايام الماضية والوفاء
بجد كلماتك لمست قلوبنا باجمل المشاعر الجميلة
تحياتى ريم
طيب اقول ايه بقى انا
اتجنن ولا اشد في شوية الشعر اللي باقين
روعة بجد
ريم مشاء الله عليكي
من يومك وانتي بتصبي احاسيسك علي الورق
ربنا يحميكي يارب
ماشاء الله تعبيراتك فعلا جميله
تحياتي
الأستاذ محمد حسنين العدل...
أنا ايضا احسدني لأنني حظيت بها يوما....
واشفق عليّ من فراقها.....
اشرقت مدونتي بمرورك العاطر عزيزي.
اونكل جابر....
قد ايه بجد وحشتني......
ومهما وصفت لك وقولت لك قد ايه انا سعيده بمرورك مش حأوفي.....
نورت المدونة وصاحبة المدونة يا أونكل...
الصديق محمد امين....
هي محاولات للتعبير عن احساسي فقط..
يسعدني ان يستقبلها الناس ويشعرون بها....
شكرا لمرورك عزيزي
إرسال تعليق